Wa hatagi’g pang-inom whisky gi-shoplift, sikop

Napusasan ang usa ka 40 anyos nga kanhi construction worker kay nangawat og mahalong bino kay giuhaw alas 10:05 sa gabii, Dominggo, April 13, 2025, sa 7/11 convinience store nga nahimutang sa Barangay Inayawan, Dakbayan sa Sugbo.

Si Joseph Cardanio Arjenio, dunay mga anak, kanhi construction worker, taga Sitio Ocampo Drive sa maong barangay.

Gidakop siya sa guwardiya sa 7/11 nga si Junrey Toqueroz.

Ang representante sa tindahan si Michelle Lopez, 27, service crew, taga Inayawan ra gihapon maoy niuban ngadto sa Presinto 7, sa Inayawan Police Station dihang gidakop ang suspek.

Nakuha gikan sa suspek ang Johnnie Walker whiskey black label 650ml nga nagkantidad og P1,799 ug Johnnie Walker whiskey double black label 700ml kandtidad og P1,699.

Niangkon ang suspek nga nangawat siya human wala hatagi sa iyang igsuon og ilimnon.

Matod ni Arjenio nga P100 lang iyang gipangayo sa iyang igsuon aron ipuno sa pagpalit sa ilimnom. Apan wala mohatag ang iyang igsuon bisan duna kini kuwarta kay duna man kini tindahan. Sa iyang kalagot aron tagdon sa iyang igsuon , gituyo niya pagpangawat sa tindahan aron sukdon kon pinangga ba gyud siya sa ilaha ug sa ilang lugar.

Apan nakugang siya kay Black label ang gipasangil nga iyang gikawat. Baratuhon ra nga bino, softdrinks ug biscuit maoy iyang giangkon nga gikuha. Ang biscuits iyang ipulotan sa ilimnom. “Dili na tinuod lahi man akong gikawat! Unya kamahal times 10 kadali mitubo” dugang ni Arjenio.

Giangkon niya nga nagbisyo siya ug gustong moinom niadtong higayuna. Gibasol niya ang ka-look alike sa ilang lugar nga gituohan niyang maoy nangawat ug napasanginlan lang siya.

Gusto niyang mopatim-aw ang iyang ka-look a like aron atubangon ang kaso sanglit siya nga inosente maoy napriso. / GPL