PATAY nang naabot sa tambalanan ang usa ka 32 anyos nga lalaki human pusila sa suspek nga sakay sa motorsiklo alas 4:20 sa hapon, Huwebes, Marso 27, 2025 sa Sitio Holy Name, Barangay Mabolo sa Siyudad sa Sugbo.
Ang biktima giila nga si Winston Inopiquez Primitiva, 32 anyos nga residente sa maong lugar.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office, nga samtang nagduwa og basketball ang biktima kalit lang naabot ang suspek nga sakay sa motorsiklo ug namusil dayong sibat.
Ang biktima dali nga gidala sa tambalanan apan gideklara kini nga dead on arrival.
Sigun ni Macatangay nga base sa gihimong imbestigasyon sa Mabolo Police Station, duna na silay giila nga person of interest apan wala lang una nganli subay sa nagpadayon nga imbestigasyon ug manhunt operation.
Drugas ang usa sa gitan-aw nga motibo sa krimen sanglit ang biktima usa usab ka drug personality diin makadaghan na kini ka higayon nga nadakpan sa buy-bust apan makagawas ra usab human mipyansa.
Dugang ni Macatangay nga sa nag-edad pa kini og 17, nagsugod na og duwa sa ilegal nga drugas si Primitiva.
Sa maong pangedaron, maka-unom na nadakpan sa kapulisan si Primitiva diin tulo niini sa kaso sa illegal drugs ug tulo sa illegal possession of firearms.
Gumikan niini, nagtuo ang kapulisan nga wala makabayad sa iyang utang sa drugas ang biktima sa iyang amo hinungdan nga gitipi.
Dako matod pa ang posibilidad nga ang naghimo sa krimen mao kadtong nalambigit usab sa illegal nga drugas.
“So mao ni ang background sa atong biktima, and we surmise based sa atong pagpangutana but we cannot conclusively tell at this point nga kining mga gabuhat sa iyaha ani nga crime are those that are likewise involved in the same kind of unscrupulous activities,” matud ni Macatangay.
Ang Mabolo Police Station nga gipangulohan ni Police Major Romeo Caacoy Jr. milusad na sa pag backtrack sa mga CCTV camera sa lugar aron ilhon ang suspek. /AYB