Nag-alindasay ang usa ka 42 anyos nga lalaki human wala nakatulog og pila ka adlaw kay giingong nigamit sa ilegal nga drugas sa Sityo Caduloy, Barangay Tisa, dakbayan sa Sugbo, pasado alas 6 sa buntag sa Lunes, Abril 22, 2024.
Ang ngan sa suspek gipugngan sa Superbalita Cebu alang sa iyang pamilya.
Giingong nagpanghadlok sa tawo nga wala siya makaila nga nagsunodsunod kaniya ug bisan naa na siya sa sulod sa balay nanuktok.
Tungod sa kahadlok, iyang gipanggakus ang iyang asawa ug duha niya ka mga anak nga nagpangidaron pa og 11 ug 6 anyos, usa kay person with disability (PWD).
Bitbit sa suspek ang napulo ka pulgada nga aluminum pipe nga iyang gition sa iyang asawa ug duha ka mga anak.
Dali nga ningresponde ang Labangon Police Station sa pagpangulo ni Police Major Eraño Regidor uban sa Special Weapons and Tactics aron ma-rescue ang mga biktima.
Samtang gi-negotiate ni Regidor ang suspek, gibutyag usab sa amahan niini nga upat na ka adlaw nga walay katulog ang iyang anak nga maoy hinungdan nganong naingon kini niini.
Nangita kini og sakop sa media nga maoy gusto niya nga maoy paduolon.
Iyang gusto nga mosulod sa ilang balay ang reporter sa Balitang Bisdak nga si Alan Domingo, busa si Regidor maoy nagpatuo nga si Domingo ug dali nila nga nasignit ang suspek.
Malampuson nga na-rescue sa mga polis ang asawa lakip na ang duha ka mga anak niini ug napusasan nila ang suspek.
Kasamtangan nga naa sa kustodiya sa Labangon Police Station ang suspek apan wala lang una isulod sa ilang custodial facility sanglit mahadlok kini nga makakita og tawo.
Matod ni Regidor nga ila kining paimnon og tambal nga pangpakalma ug pakatulogon ug ilang pasakaan og alarm and scandal sanglit ang pamilya dili mokiha.
“Amoa sa nga papahuwayon kay kon makakita’g tawo makuyawan gyud siya,” dugang ni Regidor.
Pipila ka tuig na ang nakalabay, gialarma usab kini sa mga polis human gihapon ni ni- hostage sa iyang asawa tungod sa paggamit og ilegal nga drugas. / AYB