Gipadakop ang usa ka kargador sa Pasil human nisuway og ikyas nga wala mobayad sa iyang gipainit nga puto ug sikwati ug namahad pa sa mga tindera alas 10:00 pasado sa gabii, Mayo 7, 2025, sa Magallanes St., Barangay Ermita , Dakbayan sa Sugbo.
Ang dinakpan nailhan nga si Danilo Mendoza, 42, lumolupyo sa Pasil. Ang suspek namainit sa usa ka tindahan sa nahisgutang dapit apan paghuman wala mobayad sa iyang gikaon nga nagkantidad og P50 ug giingong nibahad sa mga tindera nga iyang balikon. Hugot nga nanghimakak si Mendoza nga namahad siya ug gisayop lang pagsabot sa mga tindera.
Giangkon sa suspek nga padong siya mo-duty atong orasa isip kargador sa mga isda ug niadtong higayona wala pa siyay panihapon hinungdan maong nihapit siya sa maong tindahan para mamainit aron masudlan ang iyang tiyan.
Niangkon siya nga wala siyay kuwarta niadtong higayona kay wala pa kasugod og pagpangarga.
Iyang pasabot nga " paghuwat kay balikon tamo" kay magkuha lang siya og kuwarta ug aron mabayran iyang gikaon.
Mao ni hinungdann nga nagpakitabang sa mga nagpatrolya nga kapulisan ang mga tindera.
Ang dinakpan giingong notado nga kawatan sa Pasil ug nag-viral kaniadto nga nangawat og isda sa usa ka e-bike driver. / JDG