NAGTINGKAGOL sa Mambaling Police Station ang upat ka mga babaye nga pulos taga Bacolod City, Negros Occidental human matod pa nangawat og mga pinutos nga powdered juice sa usa ka dakong tindahan sa dalan F. Llamas corner N. Bacalso Avenue, Barangay Basak San Nicolas, Dakbayan sa Sugbo alas 6:30 sa gabii, Sabado, Hunyo 28, 2025.
Ang mga nadakpan sa mga security guard sa maong tindahan mao silang Jacky Aquino Dela Cruz, 30, Kieth Samson Hinlo, 29, Shane Serio Alpar, 30, pulos taga Barangay Singcang, Bacolod City, ug Carla Mendez Silva, 38, taga Purok Pag-asa, Barangay Alijis, Bacolod City.
Ang upat nakuhaan og mga sachet sa Tang Calamansi ug Tang Grapes nga mobalor ang tanan sa kapin P4,500.
Nabantayan na sila’ng daan sa mga guwardya sa sulod sa maong tindahan nga maoy hinungdan nga gipanid-an na sila.
Sa dihang padulong na sila nga manggawas, wala ni mohapit sa cashier ug nidiretso sila'g gawas ug dinhi na gibabagan sa upat ka guwardya ug gipanghiling ang ilang lawas ug didto nakuha ang mga pinutos nga juice sa ilang bilahan nga gisangit sa girdle.
Giangkon sa mga suspek ang krimen ug matod nila nga ang ilang kinawat ila kini nga ibaligya didto sa Bacolod City.
Mopalawom pa sa ilang imbestigasyon ang Mambaling Police Station aron sutaon kon duna pa ba ni silay laing kauban nga naa sa Siyudad sa Sugbo. / AYB