Wa pay hinabang gikan sa Cebu City

FILE
KALAMIDAD: Ang Brgy. Adlawon usa sa mga bukirang dapit sa dakbayan sa Sugbo nga gipaubos sa state of calamity, apan ang mga mag-uuma wa pay nadawat nga hinabang gikan sa Cebu City Hall. /

Kapin sa 10,000 ka mga mag-uuma sa dakbayan sa Sugbo ang padayong nag-antos sa epekto sa El Niño phenomenon sukad niadtong Pebrero 2024, nga nagkanayon nga wala pa sila nakadawat og hinabang gikan sa City Government.

Si Casimero Pilones, pangulo sa Alliance of Cebu City Farmers Association, niingon nga giimbitar na sila sa mga executive session aron ipadayag ang ilang mga kabalaka, apan hangtod karon, wala pa silay nadawat nga hinabang.

Sa dihang gipangutana bahin sa kahimtang sa mga mag-uuma sa dakbayan sa Sugbo karong panahon sa El Niño, si Pilones niingon nga makaluluoy kaayo ang mga mag-uuma kay walay tubig nga magamit sa ilang mga pananom.

“Ang mga farmer karon nagkinahanglan jud og support sa Cebu City...kon makapangita unta’g tubig nga magamit namo kay luoy kaayo ang mga mag-uuma wala jud makaon,” matod ni Pilones.

Matod pa ni Pilones nga ang gikinahanglan karon sa mga mag-uuma mao ang maayong gidaghanon sa suplay sa tubig, nagsugyot nga mahatagan sila sa Kagamhanan sa Dakbayan og mga water pump ug drills aron makapangita sila og tubig sa mga tubod.

Matod niya nga nangayo sila og materyales gikan sa Cebu City Agriculture Department (CAD) sama sa mga tanke sa tubig, hose, baril, ug mga sprayer, apan ang departamento wala nakahatag niini nga mga materyales karong tuiga.

Dugang pa niya nga ang mga mag-uuma gusto nga mohangyo sa Kagamhanan sa Dakbayan nga hatagan sila og dekalidad nga mga seedlings, tungod kay ang ubos og kalidad nga seedlings makaapektar sa kalidad sa mga utanon nga ilang anihon unya nga mosangpot sa ubos nga presyo.

Ang Alliance of Cebu City Farmers Association gilangkuban sa 72 ka asosasyon sa mga mag-uuma, diin ang matag asosasyon adunay labing menos 200 ngadto sa 300 ka miyembro.

Si Cebu City Councilor Pastor Alcover Jr., chairman sa committee on agriculture and rural development, nanawagan sa pagluwat ni Cebu City Agriculture Department (CAD) head Joselito Baclayon tungod sa grabeng pagpabaya sa katungdanan.

Sa iyang privilege speech niadtong Miyerkules, Abril 3, 2024, giakusahan ni Alcover si Baclayon nga walay plano sa pagsulbad sa kahimtang sa mga mag-uuma nga apektado sa El Niño Phenomenon.

Matod ni Alcover nga moabot sa 11,000 ka mga mag-uuma, walay labot ang ilang mga pamilya, nga mag-antos sa kagutom tungod sa hulaw dala sa panghitabo. / AML

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph