Rhodman Joseph M. Ubas / Nagsuwat, hulagway
Usahay, ang labing nindot nga mga biyahe mao kadtong walay plano. Maingon niini ang among kalit nga panaw sa akong higala sa miaging semana, usa ka wala pormaha nga pagsuroy paingon sa matahom ug bugnaw nga yuta sa Bukidnon.
Ang Bukidnon nga nailhan nga summer capital of the south, misugat kanamo sa iyang hamugaway nga hangin ug lunhaw nga kabukiran. Samtang among gisubay ang dan-ag sa adlaw sa among panaw, ang kahilom sa kabukiran daw misanong sa among kalipay.
Gikan mi sa Jagna, Bohol, misakay og barko padulong sa Dakbayan sa Cagayan de Oro. Gisugat kami sa sakyanan sa higala sa akong kauban ug gidala ngadto sa among puy-anan sa siyudad. Didto kami nipahulay samtang nagpaabot sa among sunod nga tumong: ang Dahilayan Adventure Park sa Manolo Fortich.
Pag-abot namo sa Dahilayan, gilamoy kami sa kalipay sa among pagkakita sa lapad nga malantaw sa kinaiyahan, katahom sa tanom nga murag gihikap sa ambon, ug bugnaw nga huyohoy nga murag gihuyop padulong kanamo.
Ang zipline nga labing taas sa tibuok Asia, misugod sa tumoy sa bukid ug mikaylap sa hangin. Sa among paglayog, murag kami gilupad uban sa mga langgam, gisangyawan sa kalipay ug kahadlok sa taas nga lugar.
Dili lang zipline ang naa kanila. Adunay pa silay mga ATV rides, ropes course, ug Dropzone nga makapakurat sa imong kasingkasing ug makapakitbi sa imong atay. Human sa adventure, namahulay kami ug nangaon sa ilang restawran samtang nanan-aw sa nagabawod nga kabukiran.
Sa ikaduhang adlaw, among gisuroy ang Lake Apo nga malinawon kaayo, murag salamin sa langit. Sa Pine Ridge, ang kahumot sa pino nga kahoy mipahinumdom og pasko. Ug sa RotyPeaks Ridge Camp, ang panganod murag duol na lang kaayo, makab-ot sa kamot.
Bisan mubo ra ang among biyahe, puno kini sa talan-awon nga magpabilin sa among hunahuna—bugnaw, hilom, ug matahum nga kalibutan nga naghulat lang nga bisitahon. /