Usa ka 31 anyos nga waiter ang gibalhog sa selda sa Mabolo Police Station human gireklamo sa 17 anyos nga dalagita nga tinun-an sa Grade 12 nga nanghinol sa iyang dughan alas 6 sa buntag, Huwebes, Hulyo 31, 2025 sa Upper Peace Valley, Barangay Lahug, dakbayan sa Sugbo.
Ang suspek giila nga si alyas Roger, nagpuyo ra usab sa maong lugar.
Nasayran sa imbestigasyon sa Mabolo Police Station nga unang mireklamo sa barangay ang biktima human matud pa gihikap ang iyang dughan ug iyang sampot.
Nakig-alayon dayon ang barangay Lahug sa Mabolo Police Station aron molusad og manhunt nga miresulta sa pagkasikop sa suspek.
Matud sa biktima nga si alyas Rose ngadto sa police nga samtang natulog siya sa sala sa ilang balay kalit lang nga misulod ang suspek ug gikumot-kumot ang iyang dughan ug ang iyang sampot.
Wala magtuo ang biktima nga buhaton kini sa suspek sanglit manag silingan sila ug gawas pa kauban kini sa iyang maguwang sa trabaho nga maoy hinungdan nga makasulod gawas ra kini sa ilang balay.
Kasong Acts of Lasciviousness ang ipasaka sa kapulisan batok sa manyakis nga waiter. / AYB