Way nakitang foul play ang mga imbestigador sa Tagbilaran City Police Office sa kamatayon sa mag live in partner nga French national ug Pinay sa sulod sa usa ka tent sa bakanting luna sa subdivison sa Bool District, Tagbilaran City, Bohol niadtong Biyernes sa buntag, Abril 12, 2024.
Matod ni P/Lt. Col. Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas, nagpakamatay gyud silang Sylvian Florian Delaitre, 39, ug ang iyang hinigugma nga si Jennifer Cornelio, 30, lumad nga taga San Fernando, habagatang Sugbo base sa mga ebidensya nga gihuptan sa kapulisan.
Dunay nakita’ng suicide note ang mga polis nga unang nakaresponde sa dapit, lakip na ang chemical sama sa muriatic acid ug ang gituohang hydrogen sulfide.
Ang amiga sa duha ka mga nakalas niadtong Abril 11 nipahibawo sa kapulisan sa plano, matod pa, sa duha nga magkutlo kini sa ilang kinabuhi.
“Still we are conducting investigation kon unsa pay makalap pa natong ebidensiya nga mag support ani ug kon naa pa bay laing angle ani nga hitabo,” sigun ni Pelare.
Sa medical report sa City Health doctor, nasuta nga ang hinungdan sa kamatayon sa duha mao ang asphyxia due to toxic fume inhalation.
Nidugang ni Pelare nga ang kapulisan sa TCPO wala pa mohunong sa ilang imbestigasyon ug nisusi pa sa mga ebidensya lakip na ang mga CCTV camera sa dapit diin napalgan ang patay’ng lawas niini. / AYB