Samtang nagkaduol ang deadline sa konsolidasyon sa traditional jeepney, ang Pinagkaisang Samahan ng mga Tsuper at Opereytor Nationwide (Piston) nideklarar og nationwide transport holiday.
Apan ang katugbang niini sa Sugbo niingon nga dili sila moapil sa tulo ka adlaw nga transport strike sugod karon, Lunes, Abril 29, ug matapos sa Labor Day celebration, Miyerkules, Mayo 1, 2024.
Si Greg Perez, tsirman sa Piston Cebu nga dunay 500 ka miyembro, nipahibawo nga mohimo na hinuon sila og picket rally sa adlaw sa deadline sa consolidation karong Martes, Abril 30, sa buhatan sa Land Transportation Franchising and Regulatory Board (LTFRB) sa Central Visayas sa Barangay Lorega, dakbayan sa Sugbo.
“Kami mosabay mi isip suporta sa panawagan, mag-picket rally mi sa April 30 sa hapon,” matod niya sa SunStar Cebu sa Dominggo, Abril 28, 2024.
Sa Sabado, Abril 27, ang mga national media outlet ningtaho nga ang Piston mopahigayon sa tulo ka adlaw nga transport strike.
“Ito ay kinakailangan nating gawin upang ipaglaban natin ang ating mga kabuhayan sa sektor ng transportasyon,” matod ni Piston deputy secretary general Ruben Baylon.
Ang Public Utility Vehicle Modernization Program (PUVMP) sa nagmando sa mga tradisyunal nga jeepney units sa pagporma o pag-apil sa usa ka kooperatiba o korporasyon aron magpadayon sa pag-operate.
Si Transportation Secretary Jaime Bautista nipahibawo sa Enero nga ang deadline sa konsolidasyon, nga gilugwayan sa ikawalong higayon sukad sa 2017, adto sa Abril 30.
Dugang pa, si Perez miingon nga ang desisyon nga dili moapil sa tibuok nasod base sa kabug-at sa isyu sa matag rehiyon, diin siya miingon nga dinhi sa Sugbo, kadaghanan sa mga tradisyunal nga jeepney drivers na-consolidated na.
Niadtong Enero, si LTFRB 7 Director Eduardo Montealto Jr. niingon nga ang consolidation rate sa rehiyon anaa sa 80 porsiyento. / KJF