Wanted mitunga sa korte, nasikop

Giila sa kapulisan nga ‘bad boy’ sa ilang dapit ug idlas nasikop human nitambong sa husay sa iyang kaso sa korte sa Qimonda Bldg., North Reclamation Area , dakbayan sa Sugbo sa Miyerkules sa hapon, Nobiyembre 22, 2023.

Ang akusado dunay mga kaso nga grave threats tungod sa giingong pagpanghulga sa mga silingan, apil na sa kapulisan. Human malutsi og mga warrant of arrest, nagtago-tago na kini.

Si Reynante Eyac, alyas Nante, 42, minyo, taga lungsod sa Medellin, dugay nang nagtago-tago human nag-atubang og daghang mga kaso’ng pagpanghulga sa Medellin, amihanang Sugbo.

Si Police Major Timothy Jim Romanillos, hepe sa Medellin Police Station nga nahinabi sa Superbalita Cebu, nagkanayon nga nasubay si Eyac sa ilang tracker team. Duna kiniy bista sa ubang mga kaso, busa ilang giatangan sa korte.

Gi-serve dayon ang tulo ka warrants of arrest sa kasong grave threat nga giisyu ni Judge Hyacinth John Jasraque sa Municipal Circuit Trial Court sa Medellin.

Dunay tag P36,000 nga piyansa matag usa nga gitugot ang korte.

“Sa ka daghang mga kaso niya nga pagpanghulga sa Medellin, wala na magpakita. Nakakuha tag info nga dunay bista sa laing kaso sa Qimonda. Atong gisusi mitambong man siya, atong gipusasan,” dugang ni Romanillos.

Gibutyag niya nga idlas nga pagka wanted person si Eyac. Gawas sa iyang pagpanghulga sa mga polis, naa pay daghang silingang nangreklamo tungod kay manion og armas.

Una kining nasikop niadtong Mayo 9, 2023 sa Brgy. Poblacion, Medellin. Uban nga nadakpan ang igsuong babaye nga si Ma. Lourdes Eyac, 54. Ang korte niisyu og warrant of arrest nga gipitsahan og Abril 26, 2023.

Niadtong Hulyo 3, 2023 nakaipsot si Eyac sa pagpangronda sa kapulisan sa panimalay niini sa Brgy. Antipolo, Medellin.

Si Executive Judge Samson Troy Layese maoy niisyu sa search warrant nga gipetsahan og Hunyo 27, 2023.

Atol sa ronda, ang kapulisan nakakuha og usa ka kalibre .45 nga pistola nga dunay duha ka mga magazine ug mga bala sa sulod. Niini, gipasakaan siya og kaso sa kapulisan.