GIDAKOP sa kapulisan ang usa ka construction worker nga wanted sa kasong murder human sa 11 ka tuig nga pagtagotago sa alas 3:30 sa hapon sa Huwebes, Marso 13, 2025.
Ang dinakpan giila nga si Antonio Milan Villacorta alias Toni, 48 anyos, minyo nga taga Barangay Maloray, bukirang bahin sa Lungsod sa Dalaguete, Sugbo.
Sa follow-up interview sa Superbalita, si Police Lieutenant Steven Judyll Gella, ang station commander sa 703rd Maneuver Company, Regional Mobile Force Battalion 7, miingon nga mibiya sa lungsod ang maong akusado ug didto nagtago-tago sa Cagayan de Oro City human nasayod nga gipasakaan siya og kasong murder, apan mibalik kini gumikan kay matod pa aduna pud kiniy gipatay didto.
Human na-monitor nga naa na ang suspek sa Maloray, gi-serve dayon sa mga sakop sa Dalaguete Police Station nga pinangulohan sa ilang hepe nga si Major Vincent Awit Zozobrado ang warrant of arrest nga gi-isyu niadtong Oktubre 13, 2013 ni Judge Maximo Perez sa 7th Judicial Region Branch 62 nga nagbase sa Lungsod sa Argao.
Walay gitanyag nga piyansa ang korte alang sa temporaryong kagawasan sa maong akusado. / DVG