Laborer nga wanted sa lima ka mga kasong rape nasikop sa kapulisan sa Ginatilan Municipal Police Station, Martes sa buntag, Abril 30, 2024 sa Barangay Mangaco, Ginatilan, Cebu.
Ang pagkasikop sa akusado nga si Arvin Baginbin Albierte, 31, ulitawo, taga-Amenia Uson, Masbate, nagpamatuod sa kaepektibo sa monitoring sa barangay level pa lang.
Nasayran sa Superbalita Cebu nga gipaubos sa close monitoring sa barangay kapitan sa Mangaco ang mga dayo nga moabot sa maong dapit ug namatikdan si Albierte nga bag-ong nagpuyo sa maong barangay.
Si Albierte nagsaka sa balay sa iyang ama-ama ug gipangayoan og identification card ni Barangay Kapitan Roger Miranda.
Si Miranda ang midangop sa kapulisan aron pagsubay sa pagkatawo ni Albierte nga bag-ong salta sa ilang lugar, aron pagsuta kon wa bay criminal record sa lugar diin siya gikan.
Nasayran nga wanted diay si Albierte ug adunay warrant of arrest.
Nakakuha og kopya sa warrant of arrest ang Ginatilan Municipal Police Station gikan sa Regional Trial Court sa Valenzuela City.
Gisikop si Albierte ug gipaabot nga kuhaon sa kapulisan sa Masbate aron taralon sa hukmanan. / DVG