Naglabaw unta ang Golden State Warriors bisan pa wala si Stephen Curry ug si Draymond Green nga nagka foul trouble, apan kalit mikawras ang Minnesota Timberwolves para ilugon ang home team sa Game 3 sa National Basketball Association (NBA) Western Conference semifinals sa Chase Center, San Francisco, Mayo 11 (PH time).
Giilog ni Anthony Edwards ug Julius Randle ang momentum ug gipapas ang lima ka puntos nga labaw sa Warriors sa fourth quarter aron mosakmit sa 102-97 nga kadaogan ug kuhaon ang 2-1 series lead.
Ang tres ni Edwards sa 1:19 nga nabilin sa duwa maoy misilyo sa kadaogan sa Timberwolves. Gitapos ni Edwards ang duwa nga dunay 36 puntos, samtang si Julius Randle miamot og 24 puntos, 12 ka assists ug 10 ka rebounds.
Ang Warriors misandig kang Jimmy Butler sa iyang 33 puntos, pito ka assists ug pito ka rebounds, ug si Jonathan Kuminga mitunol og 30 puntos gikan sa bench.
Dako nga epekto sa team ang pagkawala ni Curry.
“Obviously with Steph out there, he demands two to three bodies when he’s out there on the floor,” saysay ni Butler. “When he’s not, there’s no room for error. You can’t make mistakes. You can’t turn the ball over. You can’t give back all of those things. And then you’ve got to take the right shots."
Si Kuminga nakahimo og 11-of-18 field goals samtang ang Warriors naningkamot og kombinasyon sa ilang lineup aron makahulip kang Curry, kinsa nagpaalim pa sa iyang strained hamstring.
Ang Game 4 himuon karong Martes (PH time) sa Chase Center.
Gipahimug-atan ni Warriors coach Steve Kerr nga kinahanglan modaog sila pinaagi sa depensa — apan wala nila mapungi ang Timberwolves sa crucial nga minutos.
Si Edwards wala magpakita og timailhan og kasakit sa iyang sprained left ankle nga nakuha sa Game 2.
Gibutyag ni Minnesota coach Chris Finch nga para matumba nila ang beterano nga Warriors, kinahanglan niya ang tabang sa tanang players, labi na sa epektibo nga forward sama kang Randle.
“We need it all. We needed everything from Julius, his hustle plays,” sigon ni Finch. “Sometimes he does a great job of just kind of chasing down rebounds and stuff like this. We needed it all."
Ang 3-pointer ni Buddy Hield sa nahabiling 1:56 nakapaduol sa Warriors sulod sa 93-89, apan pagkahuman ana, na-turn over ni McDaniels ang bola.
Na-foul out si Draymond Green sa nahabiling 4:38, sa iyang ikaunom nga personal foul, human niya sulayan pag-block ang tira ni McDaniels nga medyo duda ang tawag base sa replay.
Gidali ni Green ang iyang dagan paingon sa bench sa kasuko, gisul-ob ang iyang warmup jacket ug nagtindog nga nagbutang sa iyang mga kamot sa hawak. / RSC