Nagmantas ang bigman nga si Anthony Davis ug gipaligid sa Los Angeles Lakers ang rival nga Golden State Warriors, 118-108, sa National Basketball Association (NBA) regular season game didto sa San Francisco, Enero 26, 2025. (PH time).
Ang beterano nga si Davis mipahagsa og double-double nga 36 puntos ug 13 rebounds, samtang ang iyang kaabag nga si LeBron James mibuhat pud og double-double nga 25 puntos ug 12 ka assists.
Misaka ang Lakers sa ikalima nga bahin sa Western Conference standing bitbit ang 25-18 (win-loss) record. Ang Warriors natagak sa ika-11 nga pwesto dala ang 22-23 nga baraha.
Ang nahimong yawi sa kadaogan sa Lakers mao ang pagpugong sa greatest shooter of all-time nga si Stephen Curry sa second half.
Si Curry wa maka iskor sa second half, sipyat ang tanan niyang walo ka itsa. Nahuman ni Curry ang duwa nga dunay 13 puntos ug siyam ka assists.
Ang maong duwa maoy ika-25 nga regular season game meeting sa mga bituon nga si James ug si Curry. Si James midaog sa 13 sulod sa 25 ka duwa.
Sa laing duwa sa California, mipabuto og 40 puntos si James Harden para aswaton ang Los Angeles Clippers batok sa team ni Giannis Antetokounmpo ug Damian Lillard nga Milwaukee Bucks, 127-117.
Mipuno si Norman Powell og 33 puntos ug miamot si Kawhi Leonard og 18 puntos sulod lang sa tulo ka quarters.
Si Antetokounmpo nakahimo og 36 puntos ug 13 rebounds, samtang si Lillard misakmit og triple-double nga 29 puntos, 10 rebounds ug 10 assists. / RSC