Mga duwa karon:
5:00 pm- Blackwater batok Phoenix
7:30 pm- Ginebra batok NLEX
Pahugtan og suway sa NLEX Road Warriors ang ilang paggunit sa ikaduhang puwesto sa Group B sa ilang pagpakigbatok sa nagsalimoang nga Brgy. Ginebra Gin Kings sa main game karong gabii, Martes, Septiyembre 3, 2024, sa Philippine Basketball Association (PBA) Season 49 Governors’ Cup sa Smart Araneta Coliseum.
Ang Road Warriors, nga naggunit og 3-1 nga rekord, nagsunod sa Group B leader Rain or shine Elasto Painters, nga adunay perpektong 4-0 nga baraha.
Ning sangkaa, magbawon og taas nga morale ang Road Warriors gumikan kay gikan sila sa overtime nga daog batok sa powerhouse squad San Miguel Beermen sa usa ka out-of-town game niadtong Agusto 31 sa Cagayan de Oro City.
Sa pagpangulo nila ni import Myke Henry ug local top gun Robert Bolick, maayo ang dagan sa kampanya sa Road Warriors ning puntoha sa komperensya.
Nakaposte sab ang Road Warriors og kadaugan batok sa Blackwater Bossing, 104-87, ug Phoenix Super LPG Fuel Masters, 100-95.
Ang bugtong lang nakapilde sa Road Warriors mao ang labing init nga puwersa sa komperensya nga mao ang Elasto Painters, 105-124.
Sa ilang bahin, ang Gin Kings adunay 1-2 nga rekord gikan sa ilang daog batok sa Beermen, 108-102, ug kapildihan batok sa Elasto Painters, 64-73, ug Bossing, 88-95.
Ning puntoha, daw padayon pa nga nag-adjust ang Gin Kings sa dakong kausaban sa ilang puwersa human pagbiya nila ni Fil-German Christian Standhardinger ug Stanley Pringle ug sa pagsulod sa bag-o nilang mga sakop lakip na niini si Stephen Holt.
Sa pagpangulo sa ilang resident import nga si Justin Brownlee, gilaumang makabangon ra ang Gin Kings sa kasamtangan nilang sitwasyon. Sa premirong duwa, magsangka ang Bossing ug Fuel Masters, nga parehong nagkagidlay.
Ang Fuel Masters wa pa’y daog sulod sa tulo ka mga duwa samtang ang Bossing adunay 1-3 nga rekord. / ESL