Wala nagpahigayon og mga duwa ang National Basketball Association (NBA) kagahapon, Martes, Abril 9, 2024 (PH time) aron paghatag og agianan sa NCAA men’s championship game.
Apan inig balik sa mga aksyon sa NBA ning Miyerkules, Abril 10, 2024, 14 ka mga engkuwentro ang ipahigayon diin 13 niini adunay kalambigitan sa nagkaduol nga playoffs.
Usa sa labing giatangan nga sangka mao ang pagsulong sa Golden State Warriors sa balwarte sa Los Angeles Lakers, nga nalantawan nang daan nga preview alang sa Play-in Tournament.
Ang Lakers kasamtangang naa sa ikasiyam nga puwesto sa Western Conference dala ang 45-34 nga rekord samtang nagsunod kanila sa ika-10 ang Warriors nga adunay 43-35 nga baraha. / AP