Nagpakita og senyales ang multi-titled Golden State Warriors nga andam na sila molangkat pagbalik og kampyunato human nila gipanglampornas ang host Portland Trail Blazers, 139-104, sa labing una nilang tahas sa bag-ong season sa National Basketball Association (NBA) kagahapon, Huwebes, Oktubre 24, 2024 (PH time).
Si Buddy Hield, kinsa nakuha sa Warriors sa offseason gikan sa Philadelphia 76ers isip tipik sa six-team trade, maoy nangulo sa dakong daog pinaagi sa iyang 22 puntos.
Nidugang og 20 puntos si Andrew Wiggins alang sa Warriors samtang niamot og 17 puntos ug 10 assists ang ilang lider nga si Stephen Curry, kinsa wala na niduwa sa 4th quarter dihang hingpit na nga nadominar sa Warriors ang duwa.
Aduna pa’y laing upat ka mga magduduwa ang Warriors nga nakatampo og dobleng numero nga puntos.
Nagkanayon si Warriors coach Steve Kerr nga mas organisado sila ning higayuna ug nakatabang og dako niini ang iyang bag-ong assistant nga si Terry Stotts, kinsa kanhi coach sa Trail Blazers.
Adunay higayon sa 1st quarter nga nisaludo si Stotts sa home crowd sa Trail Blazers isip pagpakita og respeto sa kanhi team nga iyang giserbisyuhan.
Naglabaw og siyam ka puntos ang Trail Blazers sa 1st quarter apan human niini, nisugod na og kainit ang opensa sa Warriors.
Sa halftime, nakaposte na ang Warriors og 12 puntos nga labaw, 62-50.
Pagsugod sa 3rd quarter, nakapaulbo og three-point bomb si Curry aron dugkatan ang mas nagdilaab nga opensa sa Warriors ug daw sa usa lang ka pamilok, nainat nila ang ilang labaw ngadto sa 37 puntos.
Puntos kada usa:
Golden State (139) - Hield 22, Wiggins 20, Curry 17, Moody 15, Jackson-Davis 14, Kuminga 10, Melton 10, Green 8, Payton 8, Waters 8, Santos 3, Anderson 2, Looney 2.
Portland (104) - Henderson 22, Grant 16, Simons 15, Avdija 15, Camara 11, Ayton 10, Rupert 6, Reath 3, Banton 3, Clingan 2, Murray 1. / AP