Usa ang Golden State Warriors sa mga nagpanikad nga makuha ang serbisyo ni two-time MVP Giannis Antetokounmpo sa pagsikad unya sa National Basketball Association (NBA) free agency sa sunod semana.
Gibalita sa NY Post nga ang Warriors mao ang gauna sa lumba nga makakuha kang Antetokounmpo batok sa interesado usab nga New York Knicks ug Miami Heat.
Sigon sa maong balita nga posible buhian sa Milwaukee Bucks si Antetokounmpo ilis nila Jonathan Kuminga, Brandin Podziemski, Moses Moody, ug Trayce Jackson-Davis.
Kon mahitabo kini, hayan maporma ang superteam nga naglakip ni 4-time NBA champion Stephen Curry, Jimmy Butler, ug Antetokounmpo.
Ang Warriors nangita og dugang pwersa human kini gitagak sa Minnesota Timberwolves sa second round sa playoffs sa miaging season.
Managlahi ang reaksiyon sa netizen sa paggawas sa maong balita.
Adunay miingon nga di kini mahitabo nga trade.
Dugang pa sa usa ka netizen nga di mosugot ang Bucks sa maong trade kay importante nga piyesa nila si Antetokounmpo.
May niingon pud nga kon mahitabo kini dako og tsansa nga makuha ni Curry ang iyang ikalima nga titulo kay sakto naman sa pwersa ang Warriors.
Karong Hulyo 7 sugdan na ang free agency, diin ang teams tugotan na sa pagpapirma og kontrata sa ilang napili nga players. / RSC