Gidagkotan ni Devin Booker ang init nga opensa sa Phoenix Suns batok Golden State Warriors, 113-105, sa National Basketball Association (NBA) regular season game didto sa Phoenix, kagahapon, Disyembere 1 (PH time).
Mipakatap ang All-Star guard nga si Booker og 27 puntos samtang ang iyang scoring partner nga si Kevin Durant miamot og 21 puntos para sa Suns.
Miabag sa Phoenix duo mao si Tyus Jones nga mitunol og 19 puntos ug siyam ka assists, gikan sa efficient 7-of-9 field goal ug 4-of-5 sa three-point line. Samtang si Grayson Allen midunol og 17 puntos.
Ang Golden State gisagpa sa ilang ikaupat nga sunodsunod nga pilde.
Si Stephen Curry maoy nangulo sa Warriors sa iyang 23 puntos, apan igo lang kini nakapasulod og walo sa iyang 20 ka itsa. Nidugang sa Warriors nga puntos sila Andrew Wiggins ug Draymond Green nga adunay 18 ug 13 puntos.
Wa makaduwa sa Phoenix ang ilang starters nga si Bradley Beal tungod sa calf injury ug si Jusuf Nurkic sa quad injury.
Si Beal naka-absent na og walo sa 19 ka duwa karon nga season tungod sa managlahi nga injuries.
Samtang sa lain nga Western Conference nga tapad, gitumba sa Dallas Mavericks ang Utah Jazz, 106-94, sa Salt Lake City.
Mipakatap si Kyrie Irving og 30 puntos ug midugang si Quentin Grimes og 24 puntos aron isalbar ang Mavericks nga miduwa nga wala sila Luka Doncic tungod sa right wrist injury, Klay Thompson nga dunay left foot injury, ug Dante Exum nga right wrist injury.
Midugang pud si P.J. Washington og 16 puntos ug 10 rebounds alang sa Mavericks, kinsa midaog sa uwahing upat sa lima ka duwa—tanan sa upat ka daog puros wa si Doncic. / RSC