Nangita gihapon og paagi ang Golden State Warriors aron makuha ang veteran big man nga si Anthony Davis aron mahimong bag-ong 1-2 punch kauban si Stephen Curry sa National Basketball Association (NBA) 2026-2027 season.
Nabalhin ang atensyon sa Warriors ngadto sa 10-time All-Star nga si Davis human napakyas ang ilang gihimong lakang aron makuha si LeBron James sa free agency.
Gipadayag ni Blake Silverman sa Sports Illustrated nga seryoso gihapon ang Golden State nga gukdon ang kanhi NBA champion.
Sumala ni Silverman, madanihon kaayo alang sa Washington Wizards ang tanyag nga usa o pipila ka future first-round picks gikan sa Warriors.
Usa na lang ka season ang nahabilin sa kontrata ni Davis sa Wizards.
Kahinumduman nga natagak ang Warriors sa play-in tournament sa miaging season ug wa makasulod sa playoffs.
Bug-at ang madala ni Davis sa usa ka team kay beterano naman kini sa liga isip 10-time NBA All-Star, All-NBA team ug NBA All-Defensive Team.
Nahimo kining kampiyon tuig 2020 ubos sa Los Angeles Lakers. Gipili usab si Davis isip sakop sa prestihiyosong NBA 75th Anniversary Team. / RSC
