Nangayo og pasaylo ang usa ka water resort sa Sugbo ngadto kang Talisay City Mayor Gerald Anthony “Samsam” Gullas Jr., ug sa mga residente human nga nasakpan ang ilang private garbage contractor nga naglabay og basura.
Gipagawas sa Waterworld Cebu Philippines Corporation ang ilang opisyal nga pamahayag niadtong Biyernes, Agusto 7, 2026, human gipugngan sa mga opisyal sa Dakbayan sa Talisay ang usa ka wing van nga nagkarga og basura gikan sa maong resort sa Sityo Tabok Sapa, Barangay Jaclupan niadtong Lunes, Agusto 3, 2026.
Nigawas sa mga taho sa social media ang giingong ilegal nga paghabwa og basura diin nalambigit ang contractor nga si Jovanny Coyoca ug ang drayber nga si Jerome Rivera.
Sumala sa kompanya, wala sila masayod sa gihimo sa maong contractor hangtod nga nigawas ang mga taho sa publiko.
Gipasabot sa Waterworld Cebu nga bag-o lang nilang gikuha ang maong hauling service aron mokolekta ug molabay sa hustong paagi sa natigom nilang basura.
Gipasabot sa management nga wala gyud sila magsugo o momando sa bisan unsang ilegal nga paglabay sa basura.
Padayon karon ang ilang internal investigation.
Nakig-coordinate na ang management sa maong contractor ug nakig-cooperate sa mga lokal nga awtoridad.
Nisaad sab ang Waterworld Cebu nga mohimo og legal ug contractual remedies batok sa contractor kon mapamatud-an nga nakasupak sa balaod.
Gihulagway sa kompanya ang nahhitabo nga usa ka isolated nga insidente ug gipadayag nga kanunay nilang gitahod ang mga balaod sa kalikupan ug responsableng waste management sa pila na ka tuig nilang pag-operate.
Nisaad sab ang management nga mas pahugtan pa nila ang pag-monitor sa ilang mga service provider sa sunod nga mga adlaw.
Unang gitaho sa mga opisyal sa Jaclupan ang maong wing van ngadto sa city traffic authorities kinsa nidala sa maong taho sa buhatan sa mayor. / CDF