Gipadakop sa taxi driver ang iyang pasahero human nangilad ug wala diay kuwarta nga ikaplite, niadtong alas 3:40 sa kaadlawon, Miyerkules, Mayo 14, 2025, sa N. Bacalso Avenue, Barangay Bulacao, Dakbayan sa Sugbo.
Si Alter Padayao, 24, ulitawo, taga Sitio Cabancalan 2, Barangay Bulacao, ang gitanggong sa Inayawan Police Station samtang giandam ang kasong estafa batok kaniya.
Nireklamo si Oselito Maaliao, hingkod ang panuigon, taxi driver, taga Barangay Basak Pardo dihang nagduda nga pangilad ang gihimo ni Padayao nga magpahatod sa Lungsod sa Sibonga.
Sa dihang nagbiyahe na sila nihangyo ang pasahero nga mohapit sa fast food chain aron nga mopalit og burger pinaagi sa drive-through.
Nangatarungan nga way sinsilyo si Padayao kay P1,000 nga tibuok ang iyang kuwarta ug naghuwam sa drayber aron ibayad sa giorder nga pagkaon.
Samtang nagdagan ang taxi ug igo nga naabot sa utlanan sa Barangay Bulacao, nausab ang hunahuna sa pasahero ug dili na lang molahos sa Sibonga.
Buot na sab kining magpa-ha-tod sa Mactan Cebu International Airport hinungdan nga nagduda na ang driver nga nang-scam ang maong suspek unya nahitabo ilang panaglalis ug nasuta nga wala diay ni kuwarta.
Inay sa airport ihatod, gilahos ni Maaliao iyang pasahero sa Ina-yawan Police Station. / GPL