Way krimen nga natala sa pagbukas sa Palaro

Way krimen nga natala sa pagbukas sa Palaro
P/Lt. Col. Janette Rafter

Way natala ang kapulisan sa dakbayan sa Sugbo og bisan unsa nga krimen atol sa pagbukas sa Palarong Pambansa 2024 nga gitambongan sa gibanabana nga 20,000 ka tawo, apil na niini ang kapin sa 13,000 ka mga delegado.

Gisugdan ang pagbukas sa Palaro pinaagi sa usa ka parada gikan sa dalan B. Rodriguez paingon sa Cebu City Sports Center (CCSC).

Gipakatap sa kadalanan sa Cebu City Police Office ang kapin sa 400 ka mga polis, sundalo, barangay tanod, Bureau of Fire Protection (BFP), Cebu City Disaster Risk Reduction and Management Office ug ubang ahensya sa gobyerno aron masiguro nga luwas ang mga atleta sa lainlaing rehiyon.

Matod ni P/Lt. Col. Janette Rafter, deputy city director for administration sa Cebu City Police Office (CCPO), nga nagtinabangay ang tanan aron makab-ot ang kahapsay ug malinawon ang pagsugod sa Palarong Pambansa.

Nangayo og pasensya si Rafter sa publiko tungod kay dunay mga kalsada sa uptown area nga gipangsirhan gikan sa alas 12 sa udto hangtod nga natapos ang kalihukan sa sports center diin nakahatag ni og kahasol sa mga motorista ug mga pasahero.

Hugot nga seguridad ang gipatuman sa kapulisan ug sa Presidential Security Group (PSG) tungod sa presensya ni President Ferdinand Marcos Jr. nga pinasidunggang dinapit.

Gawas sa Presidente, aduna pay laing mga bisita nga naa sa sulod sa venue nga gihatagan sa hugot nga seguridad sa kapulisan.

Sukad sa pagpangabot sa mga atleta ug mga delegado gikan sa lainlaing rehiyon, wala pa nakadawat og reklamo si Rafter nga dunay nabiktima sa krimen sa ilang tagsa-tagsa ka billeting area nga nagpasabot lang nga luwas ang tanan. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph