Walay nakita nga problema atol sa gipahigayon nga final testing and sealing kon FTS sa mga Automated Counting Machine (ACMs) sa Dakbayan sa Sugbo, Mandaue ug Lapu-Lapu.
Atol sa final testing, nisuway si Police Colonel Enrico Figueroa, ang hepe sa Cebu City Police Office (CCPO), sa pagbotar kon mogana ba ang mga ACM nga gipanghatod sa polling centers ug iyang nasuta nga epektibo ug tukma gyud kini.
Gani iyang gisuwayan og kuha og balota sa laing presinto ug gipansak kini sa laing ACM ug wala kini giihap sa makina ug giluwa tungod kay wala dawata ang bar code nga alang lang sa usa ka makina.
Kabahin sa paghatod sa mga ACMs sa polling centers sa siyudad nga gisugdan sa Miyerkules sa kaadlawon, Mayo 7, 2025, matod ni Figueroa nga nagmalampuson kini ug wala sila makasugat og problema.
Nangunay si Figueroa sa pagsusi sa mga tunghaan kon gihatagan ba og hugot nga seguridad sa mga polis ang maong mga makina gikan sa Treasurer’s Office sa Cebu City Hall.
Matod ni Figueroa nga niadtong milabay nga buwan pa nila gipangandaman ang eleksyon diin matag semana dunay himuon nga command conference, coordination meeting uban sa mga buhatan sa gobiyerno aron maseguro nga hapsay, han-ay ug malinawon ang paghatag sa seguridad sa mga kalihukan sa eleksyon.
Atol sa adlaw sa piniliay, mopakatap ang CCPO og 1,271 ka mga police personnel sa polling centers aron maseguro nga walay mahitabong kasamok.
Human nga nahatod ang maong mga ACM sa matag classrooms sa matag tunghaan, bantayan na kini sa mga polis sulod sa 24 oras hangtod nga mahuman ang eleksyon sa Mayo 12.
Samtang didto sa Dakbayan sa Mandaue, walay nakita nga problema atol sa pagpahigayon sa FTS sa ACMs sa nagkalainlaing presinto sa dakbayan.
Matod ni Jacquelyn Reuyan, Election Officer II sa Commission on Elections (Comelec) sa Mandaue, fully functional na ang tanang ACMs nga gipakatap sa dakbayan.
“So far, there have been no reports of defective or malfunctioning machines. Everything is working as expected,” matod ni Reuyan.
Adunay 271 ka ACMs alang sa Mandaue ug 38 ka contingency machines nga mag-standby.
Namatikdan sab sa mga botante ug mga tigpaniid ang pagkaepektibo sa proseso.
Matod ni Niño Handumon, usa sa mga residente nga nisalmot sa mock voting, mas hapsay ang sistema karon.
“Mas dali ra karon ang pag-process sa balota. Mas sayon ug mas walay hasol,” siya nagkanayon.
Dugang niya nga mas paspas ug mas user-friendly ang ballot handling ug machine verification karon kon itandi sa nangagi nga mga eleksyon.
Sa Siyudad sa Lapu-Lapu, malampuson nga gipahigayon ang FTS sa automated counting machines sa 38 ka voting centers niadtong Miyerkules, Mayo 7, matod ni Election Officer Ann Janette Lamban.
Sa pakighinabi sa SunStar Cebu, si Lamban niingon nga gipahimutang na sa ilang tagsatagsa ka classroom ang mga gipangsilyohan nga mga makina human kini gitestingan.
Gidugang ni Lamban nga sa adlaw sa piniliay, ang access sa ACMs limitado ra niadtong mga miyembro sa Electoral Board ug sa gitudlo nga DESO-technical support staff.
Ang tigpamaba sa Lapu-Lapu City Police Office nga si Lt. Col. Christian Torres nagkanayon nga upat ka mga polis ang gitahasan nga mobantay sa mga makina sa tibuok gabii sa matag polling center.
Gipasalig niya nga ang proseso sa eleksyon hugot nga bantayan sa mga awtoridad aron malikayan ang tampering.
“This is what I want to tell them that if you want security much more the Commission wants security. The Commission will not only protect the interest of the candidate, but it is the interest of the entire Filipino people who want to express their will during the election,” sumala ni Lamban.
Wala ra hinuoy nakita nga problema atol sa paghatod sa 302 ka mga ACMs ngadto sa mga voting centers, nga adunay 42 ka backup units nga naka-standby isip kabahin sa contingency plan sa Comelec kon adunay technical breakdowns.
Giandam na sab ang standby generator sa canvassing area sa session hall sa Lapu-Lapu City Hall aron maseguro nga magpadayon ang pag-ihap sa mga boto kon ugaling mag-brownout. / AYB, CAV,DPC