Walay nakitang foul play ang Mandaue City Police Office sa kamatayon sa usa ka 28-anyos nga call center agent human molayat sa ika-18 nga andana sa tower 3 sa usa ka condominium nga nahimutang sa Barangay Banilad, Dakbayan sa Mandaue alas 5:30 sa buntag, Dominggo, Hunyo 22, 2025.
Ang biktima nga si alyas Aljier lumad nga taga San Carlos City, Negros Occidental, napalgan na lang nga wala nay kinabuhi sa ground floor sa condominium tungod sa dakong kadaot sa ulo ug lawas niini.
Matod ni Police Lieutenant Colonel Mercy Villaro, ang information officer sa MCPO, nga gipakita sa management sa condominium sa ilang kopya sa CCTV footage ang mga imbestigador sa Station 4 ug nakita nga walay laing tawo nga nisulod sa unit niini atol sa insidente.
Sa kuha sa CCTV, makita ang aisle sa condo unit sa biktima nga way laing tawo nga nisulod ug nasuta nga siya rang usa.
Nagpasabot kini nga walay nagtukmod sa biktima aron mahulog sa ika-18 nga andana nga maoy hinungdan sa iyang hinanali nga kamatayon.
Ang pamilya sa biktima nga gipakita sab sa CCTV camera, kombinsido nga walay laing tawo ang nihimo sa krimen ug kontento ra sab sa imbestigasyon sa kapulisan.
Samtang ang mga higala sa biktima nga nasayod sa kinabuhi niini nitug-an sa pakighinabi sa DyHP nga naguol kini pag-ayo sa ilang panagbuwag sa iyang hinigugma.
Nag-ipon na sila pagpuyo sa condominium nga ilang giabangan apan pipila ka buwan ang nakalabay nagbuwag ra sila.
Bisan pa man nga nagbuwag na sila, ang ex niini motabang gihapon pagbayad sa abangan sa condominium ug natingala na lang sila nga niambak ang biktima sa building. / AYB