Gipadad-an og engineer ni Mayor Nestor Archival ang way hubas-hubas nga baha sa dalan sa White Road, Inayawan, Dakbayan sa Sugbo aron pangitaan og sulbad ang problema.
Niadtong hapon sa Martes, Hulyo 22,2025, gikuyogan ni Kapitan Atty. Kirk Bryan Jaca Repollo ang mga kawani sa Department of Engineering and Public Works (DEPW) aron makakita sa sitwasyon sa dalan nga gilunopan sa tubig-uwan.
Sulod sa dugay nang katuigan nag-antos ang mga lumolupyo sa Sitio Bagong Silang, Bagong Paglaom, Bagong Pag-asa, ug taga White Road sa ilang dalan nga bahaon kon mag-uwan.
Ang maong dalan maoy agian sa mga lumolupyo kon mogawas sa White Road.
Walay kagawasan ang tubig-baha tungod kay wala mahuman ang drainage project kaniadto ni Cong. Bebot Abellanosa, kay gibabagan kini sa usa ka pamilya nga wala mopasugot nga moagi ang tubig sa ilang giangkon nga yuta.
Gisusi ni Repollo ug sa DEPW ang gitagana unta nga agianan ug gidala kini sa gipalapdan nga sapa aron makapangitaan og paagi para sa isumpay nga drainage.
Niadtong miaging semana, mga lumolupyo nga apektado nipadangat sa ilang problema sa pamasin nga mapaminaw ni Mayor Archival ug mahatagan og sulbad .
Personal sad nga gipadangat sa kapitan ang problema ngadto sa mayor hinungdan nga nagpadala siya og mga engineer nga mosusi aron kahatagan og sulbad ang problema.
Tungod sa aksiyon sa mayor, nagpasalamat si Repollo ug nanghinaot nga masulbad sa labing daling panahon ang problema. / VLM