Sa dul-an 50 ka mga bus driver ug conductors sa Cebu South Bus Terminal nga gipaubos sa kinalit nga drug test sa Philippine Drug Enforcement Agency 7 (PDEA 7) sa pakig-alayon sa Land Transportation Office (LTO) ug managament sa CSBT, way bisan usa kanila nga tiggamitan sa ilegal nga drugas human nigawas ang resulta.
Kini nga kalambuan gikalipay sa PDEA 7 sanglit nagpamatuod nga way nigamit sa ilegal nga drugas pipila ka adlaw sa wa pa sila gipaubos sa drug test.
Matod sa ahensya nga bisan way bisan usa kanila nga nagpositibo sa paggamit sa ilegal nga drugas, kini mensahe niadtong mga driver nga nagumon sa drugas nga dili na sila maghuwat nga masakpan.
Kon mahimo, sila na mismo ang moboluntaryo sa pagduol sa buhatan sa PDEA aron mopaubos og treatment ug rehabilitation tungod kay dako sila og responsibilidad nga gihuptan nga mao ang kinabuhi sa ilang mga pasahero.
Awhag sa maong ahensya sa mga bus company nga labing maayo nga estrikto nila nga ipatuman ang drug-free work place nga maoy gimandato sa balaod. (AYB)