WBF Australasian title fight Wenceslao vs. Sanchez

■ Engkwentro: Si Roger Potot sa ARQ Sports Promotions (ikaduha gikan sa tuo) kauban ang mga boksidor, trainers, ug kaabag kabahin sa boxing promotions nga ipahigayon sa ARQ sa tuig 2024. / Erwin S. Lirazan
■ Engkwentro: Si Roger Potot sa ARQ Sports Promotions (ikaduha gikan sa tuo) kauban ang mga boksidor, trainers, ug kaabag kabahin sa boxing promotions nga ipahigayon sa ARQ sa tuig 2024. / Erwin S. Lirazan

Human sa mangil-ad niyang kasinatian sa sayong bahin sa iyang boxing career, nakakita na si Rodel Wenceslao og saktong panimalay nga mag-agak kaniya sa saktong dalan – ang ARQ boxing stable sa Sugbo.

Paglabay lang sa dul-an sa duha ka mga tuig ubos sa kampo ARQ, nakabaton na og usa ka regional title bout si Wenceslao, kinsa lumad nga taga Kananga, Leyte ug kasamtangang nagpuyo sa Mandaue City.

Si Wenceslao nakatakdang makig-away kang Ernie San­chez sa General Santos City alang sa inilugay sa World Boxing Foundation (WBF) Australasian welterweight strap sa main event sa Engkwentro 12 - “Binumbahay sa Cawayan” karong Marso 8, 2024 sa Cawayan, Masbate.

“Excited kaayo ko kay makaduwa na ko’g title fight. Da­ko ko’g pasalamat ni sir Jason (Alquizola). Pasalig nako nga dag-on ni nako kay sakto na kaa­yo ko sa training dili pareha sa una nga sariling sikap ko,” matod ni Wenceslao sa usa ka press briefing sa Golden Prince Hotel.

Si Roger Potot sa ARQ Sports Promotions nagkanayon nga dihang niabot si Wenceslao sa ilang tugkaran, mas daghan pa ang pilde niini kay sa daog apan nausab na ang dagan sa karera niini ning higayuna.

“Before siya naabot sa ARQ, mas daghan ang iyang pilde compare sa iyang daog pero pag-abot niya sa ARQ, six straight wins na siya,” matod ni Potot.

Ang trainer ni Wencesalo nga si Eldo Cortes nagkanayon nga wala unta sila’y plano nga kuhaon si Wenceslao tungod sa ngil-ad nga rekord niini ug edaran na sab kini.

“Dapat dili ni namo siya kuha­on kay edad-edaran na pero ku­gihan man gud kaayo, maong among gikuha,” matod ni Cortes.

“Mao na ang akong gipangita sa boxer kanang kugihan ka­ayo, motuman sa among itudlo. Dako-dako gyud og nausab sa iyang away kumpara sa una kay karon naa nay sestima, dili pareha sa una nga barabara lang ang iyang style.”

Si Wenceslao, kinsa nag-edad na og 30, naggunit na karon og 20-19-2, 9KOs nga rekord samtang ang iyang kontra nga si Sanchez adunay 21-19-2, 12KOs nga baraha.

Aduna pa’y laing upat ka professional bouts sa promosyon nga gitambayayungan pagpasi­ugda sa ARQ Sports Promotions ug Cawayan local government.

Magsangka sila si Berland Robles (10-0, 4 KOs) batok Robert Paradero (18-7-1, 12 KOs, Brix Piala (8-1, 3 KOs) batok Ken Jordan (9-5-2, 8 KOs), Yeroge Gura (7-0-1, 3 KOs) batok Kier Espere (6-5-1, 2 KOs) ug Angelus Pilapil (1-0, 1 KO) batok Mark Sabang (1-0-1).

Magsilbeng lamas sa promosyon mao ang 15 ka amateur bouts. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph