WBO mimando nga mag-rematch sila Suarez, Navarrete

Nakabaton dayon og laing kahigayunan si Filipino Charly Suarez nga makalabni og world title human nimando ang World Boxing Organization (WBO) og dinaliang rematch sa ilang kontrobersyal nga away ni super featherwight champion Mexican Emanuel Navarrete niadtong Mayo 10, 2025, sa San Diego, California.

Sa gitumbok nga away, nidaog si Navarrete pinaagi sa 8th round technical decision human nideklerar ang ring physician nga dili na siya puweding makapadayon og away tungod sa dakong gisi sa ibabaw nga bahin sa iyang mata.

Ang referee nidesisyon nga ang dakong gisi nga nasinati ni Navarrete nahitabo tungod sa accidental headbutt.

Apan human sa ubay-ubay nga pagbalik og salida sa video, nasuta nga ang kumo ni Suarez maoy hinungdan nga nagisian si Navarrete.

Tungod niini, nidesisyon ang California State Athletic Commission’s (CSAC) nga himuong no-contest ang away. / ESL