Webmasters mikampyon sa Surigao

Webmasters mikampyon sa Surigao
KAMPYON: Nag-courtesy call ang UC Webmasters ni coach Kenneth Kernn Sesante sa opisina ni UC Presi­dent Atty. Augusto “Gus” W. Go ug Chancellor Candice Gotianuy aron ipresentar ang kampyunato nga ilang nakuha sa usa ka dakong torneyo sa Tagana-an, Surigao del Norte. Naa sab sa hulagway sila si UC Athletic Director Jessica Jawad-Honoridez ug Webmasters assistant coaches Calib Gawangon ug Reggie Licanda. / TAMPO

Daw bangag sa dagom ang gilutsan sa University of Cebu (UC) Webmasters sa wala pa nila nabuntog pinaagi sa overtime ang Aleg­re Miners, 91-88, naghatag kanila sa kampyunato sa 2024 Diaz Bros Open Basketball Tournament ning bag-uhay lang sa Tagana-an Sports Complex sa Tagana-an, Surigao del Norte.

Ang Webmasters ni coach Kenneth Kernn Sesante gipa­ngulohan ni Danie Boy Lapiz pinaagi sa iyang 24 puntos ug unom ka rebounds samtang nitampo og 21 puntos ug tulo ka rebounds si Jepherson Nonol.

Sa panahon nga gikinahanglan, niamot og mahinungdanong mga puntos sila si John Angelio ug McSteven Ursal aron tabangan ang Webmasters nga mahatod sa kalam­pusan.

Si Angelio maoy nakapugos sa overtime dihang natabla niya ang duwa, 81-81, sa himatyong mga segundos sa regulation period.

Samtang nakapasulod og duha ka freethrows si Ursal sa hinapos nga bahin sa overtime nga maoy nakaselyo sa kulbahinam nga kadaugan.

Nidugang og 14 puntos ug 10 ka rebounds si Ursal alang sa Webmasters samtang nitunol og unom ka puntos ug pito ka rebounds si Angelio.

Naggukod ang Webmasters og 11 ka mga puntos pagkahuman sa tulo ka quarters apan nagkumboya ang ilang mga sakop sa 4th quarter ug ina­nay silang nakagukod.

Nidugang og pito ka mga puntos matag usa sila si Rey Sordilla ug Jhiey Paraldo alang sa Webmasters samtang nagkumboya og 12 puntos sila si Charles Libatog, Luther Leo­nard ug Jasper Pacana. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph