Mga duwa karon:
4:00 pm- JRU batok UC
6:00 pm- UV batok UE
Gipakaging sa University of Cebu (UC) Webmasters ang mas inilog nga University of the East (UE) Red Warriors, 89-85, niadtong Huwebes sa gabii, Agusto 6, 2026, atol sa pagsugod sa 2nd Cebu City Collegiate Invitational Basketball Tournament sa Cebu City Sports Institute sa Barangay Sawang Calero, Dakbayan sa Sugbo.
Parehong nagbangis sila si Rico Sordilla ug Maverick Eligoyo aron pangulohan ang kadaugan sa Cebu Schools Athletic Foundation Inc. (Cesafi) runner-up batok sa representante sa UAAP sa Manila.
Si Sordilla nagpakatap og 35 puntos samtang nidugang og 29 puntos si Eligoyo.
Sa laing duwa, ang laing team sa Manila nga ning-asdang alang ning maong torneyo nga mao ang Jose Rizal University (JRU) Heavy Bombers ningbomba sa Cesafi 3rd placer Benedicto College (BC) Cheetahs, 78-65.
Sa premirong duwa karong Sabado, Agusto 8, kontrahon sa Webmasters ang Heavy Bombers, nga representante sa NCAA.
Sa main game, ang Cesafi multi-champion University of the Visayas (UV) Green Lancers makigbatok sa Red Warriors. / ESL