Nagtingkagol na karon sa bilanggoan sa Naga City Police Station ang usa ka welder nga nadakpan sa ronda sa kapulisan nga nipatuman sa search warrant nga giluwatan sa korte.
Ang suspek nga nadakpan giila nga si Leotard Sanchez Omambac, 42, minyo, taga Sityo Luym, Brgy. South Poblacion, Siyudad sa Naga, habagatang Sugbo.
Alas 6:45 sa buntag sa Sabado, Pebrero 17, 2024, ang kapulisan sa Siyudad nga gipangulohan sa ilang hepe nga si Police Lt. Col. William Homoc, nironda sa balay ni Omambac pinasikad sa search warrant nga giluwatan ni Regional Rrial Court (RTC) Branch 76 Presiding Judge Dennis C. Larrobis sa Dakbayan sa Naga.
Ang kapulisan ni-apply og search warrant human sila nakadawat og taho nga dunay way lisensya nga armas ang suspek.
Ang ronda nga gisaksihan sa usa ka barangay konsehal nagmalampuson human nakakuha ang kapulisan og usa ka .45 caliber pistol nga dunay usa ka magazine ug unom ka mga bala.
Human niini, gidakop si Omambac sa raiding team.