Nakabsan sa kinabuhi ang welder nga nakuryentihan samtang nagtrabaho sa buwangan sa Brgy. Teguis, lungsod sa Poro sa isla sa Camotes, alas 5 sa hapon, Miyerkules, Agusto 21, 2024.
Ang biktima giila nga si George Gorgonio, 25, minyo ug taga Berside, Poro.
Sa pakigsusi sa Superbalita Cebu ngadto sa hepe sa Poro nga si P/Capt. Vicente Chavez , nahibaw-an nga ang biktima nag-welding sa maong cockpit arena apan sa dihang nahuman na unta, kini nanghipos sa iyang mga gamit ug niibot sa iyang grinder sa outlet sa kuryenti apan disgrasya kining na kuryentihan.
Gisuwayan sa pagtabang ug daling gidala sa tambalanan apan pipila ka mga oras, nakabsan kini sa iyang kinabuhi gumikan sa grabing paso nga naangkon sa kamot ug ubang bahin sa lawas. / DVG