Sugdan sa host Oklahoma City Thunder ug Minnesota Timberwolves ang gikahinaman nilang engkuwentro sa Western Conference finals series sa National Basketball Association (NBA) sugod karong alas 8:30 Miyerkules sa buntag, Mayo 21, 2025 (PH time).
Ang Thunder, nga maoy No. 1 overall human sa regular season nga naghatag kanila og homecourt advantage sa tibuok playoffs, karon pa nakabalik sa conference finals gikan niadtong 2016.
Sa ilang bahin, ang Timberwolves nakaabot ning puntoha sa niaging season apan gipilde sila sa Dallas Mavericks sa series.
Sa ilang upat ka mga panagsangka sa regular season, nagtabla ang Thunder ug Timberwolves, 2-2.
Niini, gilaumang kulbahinam ug makapaukyab nga kombati ang masaksihan sa ilang panag-abot ning best-of-seven series.
Alang ni Timberwolves coach Chris Finch, ang ilang kasinatian sa niaging season nakatabang og dako aron mahashasan ang ilang kapasidad isip usa ka puwersa.
“Certainly last year’s experience helps a ton, and that’s what really this is all about — layering these experiences on top of each other so you can draw from them time and again and gain confidence,” matod ni Finch nga napatik sa AP News.
Sa ilang bahin, ang Thunder nagbitbit og grabe ka taas nga morale human sila nakaposte og franchise record nga 68-14 sa regular season ug mao kini ang usa sa ilang mga hinagiban.
Ning sangkaa, giatangan og maayo ang panagparang nila ni Shai Gilgeous-Alexander sa Thunder ug Anthony Edwards sa Timberwolves.
Apan ang labing mahinungdanon mao ang suportang madawat nila ni Gileghous-Alexander ug Edwards gikan sa ilang mga kauban.
“Just trying to be where our feet are in the moment, see what’s in front of us and try to attack it, come out on the right end of it,” matod ni Gilgeous-Alexander, kinsa maoy nag-una sa inilugay sa MVP award karon nga season.
“I think that’s why we’ve gotten this far in the season, and we’re going to continue to do so.” / Gikan sa wires