Dili na gamiton ni Russell Westbrook ang iyang $3.5 milyon nga player option alang sa umaabot nga NBA season ubos sa Denver Nuggets ug mopili na lang siya nga mahimong free agent, matod sa usa ka kasaligan nga tinubdan nga nakig-istorya sa The Associated Press kagahapon, Hunyo 14, 2025.
Apan ang maong desisyon dili nagpasabot nga dili na gyud mobalik si Westbrook sa Nuggets, sumala sa tinubdan nga nangayo og anonymity kay wala pa gyud kini opisyal nga gipahibalo sa duha ka kampo.
Una kining gi-report ni NBA reporter Marc Stein, ug pagkahuman gisundan og kumpirmasyon gikan sa ESPN ug The Denver Post.
Niadtong season, nakarekord si Westbrook og 13.3 puntos, 4.9 rebounds ug 6.1 assists matag duwa para sa Nuggets — iyang ika-17 ka tuig sa NBA.
Nakatabang siya sa Denver nga makaabot sa ikaduhang hugna sa playoffs, apan napildi sila sa Game 7 batok sa Oklahoma City Thunder. / RSC