Ningmugna og 27 puntos matag usa sila si Anthony Edwards ug Karl-Anthony Towns aron pangulohan ang mas bangis nga kadaugan sa Minnesota Timberwolves batok sa host ug defending champion Denver Nuggets, 106-80, sa Game 2 sa ilang Western Conference 2nd round playoffs series sa National Basketball Association (NBA) ning Martes, Mayo 7, 2024 (PH time).
Ang Timberwolves mobiyahe pabalik sa ilang balwarte alang sa magsunod duha ka mga duwa nga bawon ang makapadasig nga 2-0 nga bintaha sa best-of-seven series.
Sa pagkadominante sa Timberwolves ning sangkaa, ning-ulbo sa kapungot ang mga sakop sa Nuggets diin nakita sila si coach Michael Malone ug guard Jamal Murray og mga butang sulod sa korte.
Nahimo kini sa Nuggets bisan wala ang ilang pambatong sentro nga si Rudy Gobert, kinsa niuli sa iyang balay sa Minnesota aron mosaksi sa pagkatawo sa iyang anak.
Ang Nuggets gipangulohan ni Aaron Gordon pinaagi sa iyang 20 puntos, nidugang og 16 puntos ug 16 sab ka rebounds si Nikola Jokic samtang niamot og 13 puntos si Justin Holliday.
Si Murray, kinsa naila una nga usa ka makapaukyab nga magduduwa sa opensa, igo ra nitampo og walo ka mga puntos alang sa Nuggets.
Ang Nuggets nakatilaw lang og labaw sa pagsugod sa duwa, 2-0, ug human niini, ningbulhot na ang Timberwolves paingon sa 61-35 nga bintaha sa halftime.
Nagpadayon ang bangis sa Timberwolves hangtod nga ningburot sa kapin sa 30 puntos ang ilang labaw sa 3rd quarter ug wala na molingi pagbalik. / AP