Gi-award sa kagamhanan sa probinsya sa Sugbo sa Suez Group pinaagi sa Economic Enterprise Council (EEC) ang Original Proponent Status (OPS) sa dugay na nga waste-to-energy (WTE) project sa lalawigan.
Ang OPS gi-grant sa probinsya human miduso og unsolicited proposal si Suez Project Development Director Kohei Kimura atol sa tigum niini sa EEC sa Oktubre 10 sa Kapitolyo.
Ugaling masugdan na, ang gitinguhang proyekto tukoron sa 7.6 ektaryang luna nga gipanag-iya sa Kapitolyo sa Barangay Tinaan, dakbayan sa Naga.
Mahimo na nga ihatod ang mga basura sa mga lokalidad sa WTE facility nga mahimong energy source unya sa probinsiya.
Ang Suez Group usa ka French-based global utility company nga nag operate sa 70 ka mga nasud ug nag specialize sa water and waste management.
Lakip sa ilang negosyo ang waste treatment, recycling, resource recovery, water management, ug development sa mga teknolohiya.
Nasayran nga tinguha sa kompaniya nga mobubo og moabot P9.12 bilyones nga pundo alang sa proyekto aron masolusyonan ang nagkalapad nga problema sa basura sa probinsya.
Gipahibawo sa kagamhanan nga ang maong joint venture ipaubos sa Build-Transfer-Operate (BTO) nga paagi. / ANV