Yaya, biyuda ‘dunay’ dul-an P7M shabu

Yaya, biyuda ‘dunay’ dul-an P7M shabu

Dul-an sa P7 milyunes nga balor sa shabu ang nasakmit gikan sa duha ka mga babaye atol sa buy-bust sa Sitio Puntod, Barangay Mambaling, dakbayan sa Sugbo, ala 1 sa kaadlawon sa Biyernes, Disyembre 8, 2023.

Nasikop ang subject sa operasyon nga si Judith Dignos, 43, minyo, kanhi yaya, taga Sitio Mahayahay 2, Barangay Calamba, dakbayan sa Subo.

Giila siya sa kapulisan nga usa ka high value individual (HVI).

Lakip sa napusasan si Victoria Empalmado Aida, alyas Beky, 50, biyuda, taga Sitio Cadasig, Barangay Tisa, dakbayan sa Sugbo.

Sila si Major Jonathan Taneo, hepe sa Mambaling Police Station, uban sa iyang mga sakop sa Drugs Enforcement Unit (DEU) maoy nakasikop sa duha ka mga suspek.

Nasakmit gikan kang Judith ang 10 ka dagkong putos sa shabu, duha ka medium nga putos, P8,000 nga boodle money ug sling bag.

Samtang si Beky nakuhaan og 2 ka medium size nga putos. Ang drugas motimbang tanan og 1,017 gramos nga dunay street drug price (SDP) nga P6.9 milyunes.

Si Judith nga nahinabi sa Superbalita Cebu human sa buy-bust, nagkanayon nga ang shabu nga iyang gibaligya gikan sa Abuyog, Southern Leyte.

Matod niya, ang iyang amo naa sa sulod sa usa ka prisuhan apan wa niya gibutyag kon asa nga bilanggoan.

Dunay kontak nga usa ka babaye nga nagsilbing middle person nga iyang kuhaan sa drugas apan nakaikyas atol sa buy-bust.

Asoy ni Judith nga ang usa ka kilo nga ilang gikuha sa kantidad nga P1.3 milyon mohalin og P2 milyunes.

Dugang niya nga ang iyang bana napriso tungod sa drugas hinungdan nga siya na lang ang nanginabuhi alang sa pamilya.

Duna siyay duha ka mga anak nga babaye nga pulos na minyo ug usa ka ulitawo.

Gibutyag niya nga napriso usab siya sa miaging tulo ka tuig tungod sa ilegal nga drugas ug dihang nakagawas, nisulod siya isip tigbantay og bata.

“Nisulod kog yaya didto sa Lapu-Lapu. Kay naay nag-agni nako (negusyo og drugas). Akong gisuwayan may na lang maka-income,” dugang ni Dignos.

Ang kapulisan nihimo pa og dugang imbestigasyon sa kaso ug nagsubay sa ilang koneksiyon sa sindikato sa ilegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph