Human sa makasaysayon niyang pagsakmit og duha ka gold medals sa 2024 Paris Olympics, nibalik na pagsalmot og kompetisyon si Filipino gymnastics superstar Carlos Yulo ug nakakuha kini og bronze medal sa men’s individual all-around event sa 2025 Asian Men’s Artistic Gymnastics Championships niadtong Huwebes, Hunyo 5, sa Jecheon, South Korea.
Si Yulo nakahipos og 83.633 sa kinatibuk-an aron angkunon ang ikatulong luna sunod sa Japanese gymnasts nga sila si Oka Shinnosuke (85.134) ug Hasegawa Tsuyoshi (83.967).
Gawas ni Yulo, adunay pa’y laing mga Pinoy nga ningsalmot sa kompetisyon nga mahuman karong Dominggo, Hunyo 8.
Kini mao sila si Juancho Miguel Besana, John Ivan Cruz, Justine Ace De Leon, ug Jhon Romeo Santillan.
Sa 2024 edition ning maong kompetisyon, si Yulo nakahakot og upat ka gold medals gikan sa individual all-around, floor exercise, vault, ug parallel bars events. / ESL