Gumikan sa viral video nga nagpakita sa grupo sa mga menor de edad nga gituohang naghingos og gituohan nga rugby ang sulod samtang sakay sa usa ka public utility jeepney, usa ka lokal nga magbabalaud nagtuo nga gikinahanglan ang panagsabot sa ubang local government units (LGUs) aron matubag ang maong problema.
Niadtong Martes, Abril 9, 2024, usa ka grupo sa mga menor de edad nisakay duol sa skywalk sa General Maxilom Avenue sa jeepney route 17B paingon sa Brgy. Sto. Niño, ug nakamugna og kasamok sa mga pasahero.
Sa pakighinabi sa telepono sa Miyerkules, Abril 10, 2024, si Konsehal Phillip Zafra, chairman sa committee on peace and order sa Konseho sa Dakbayan sa Sugbo, niingon nga base sa data sa anti-mendicancy board, kasagaran sa ilang giluwas dili gikan sa dakbayan sa Sugbo, apan gikan sa mga probinsiya.
Matod ni Zafra nga kinahanglan nga adunay arrangement o ba kaha usa ka memorandum of agreement (MOA) uban sa ubang LGUs, ang mga lungsod diin nagpuyo ang maong street dwellers, nga nagpasalig nga kon i-turn over na sila sa Siyudad, atimanon kini ug dili tugotan nga makabalik sa ilang paglibod-suroy sa laing lugar.
Kabahin sa mga menor de edad nga ningsakay sa PUJ, usa ang nakuhaan sa video nga naghingos sa cellophane nga adunay su’d nga solvent, si Zafra niingon nga subo tan-awon nga hangtod karon duna pay mga bata nga nahulog sa maong bisyo.
Matod ni Zafra nga gawas nga ang kapulisan sa dakbayan maoy responsable sa pagluwas sa maong mga bata, ang Department of Social Welfare Services (DSWS) maoy gitahasan usab sa pagsubay kon si kinsa sila.
“Ang akong gusto mao nga imbestigahon ang mga ginikanan, aron mangutana nganong gitugotan nila ang ilang mga anak nga mahulog sa maong kawad-on,” matod ni Zafra. / AML