GIKATAKDANG pirmahan ni outgoing Cebu City Mayor Raymond Alvin Garcia ang bag-ong giaprobahan nga Zoning Ordinance.
Si Garcia niingon atol sa press conference niadtong Biyernes, Hunyo 27, 2025, nga sa dihang madawat na niya ang mga dokumento, mogahin siya og panahon sa pagrepaso niini una kini niya pirmahan.
Duha pa ka adlaw nga nahabilin sa dili pa ang turnover sa Hunyo 30. Matud ni Garcia nga iyang susihon ang mga dokumento karon’g weekend.
Dihang gipangutana kon mahimo ba niya nga i-review ang mga dokumento nga gihatag sa limitado nga oras, si Garcia positibo nga mitubag.
“Madala oy, taas pa ang weekend,” matod niya.
Kabahin sa pag-reject sa maong ordinansa, gihimakak ni Garcia ang posibilidad sa pagbuhat niini, nga nagkanayon nga wa siyay plano nga i-veto ang nahisgutang ordinansa.
“Ever since before, I was already for the Zoning Ordinance nga ma-update kay 1996 pa na unya unsa nagud ta karon, 2025,” matod niya. / JPS