NASAYRAN nga ang pag-atras sa mga magtutudlo aron nga moserbisyo alang sa Mayo 12 nga bugnong lugaynon sa Cotabato City dili tungod sa ilang kahadlok, sumala sa Commission on Elections (Comelec) sa Cotabato City.
Giingong ang hinungdan sa pag-atras sa mga magtutudlo aron nga mamahimong miyembro sa electoral boards may kabahin sa kahimtang sa ilang panglawas ug personal nga rason sa eleksiyon karong Lunes.
Kini ang giklaro ni Cotabato City Comelec Officer Atty. Dindo Maglasang diin iyang gikompirmar nga napulo na ka magtutudlo ang niluwas sa maong responsabilidad.
Gisulti ni Maglasang nga ang uban kanila gipangatarungan ang medical issues sa ilang lawas, samtang ang uban dunay mga prior commitments.
Bugtong panawagan ni Maglasang ngadto sa ubang mga magtutudlo nga kon duna sila'y tinguha nga moatras sa pagserbi, mokontak dayon sa iyang buhatan aron mangita'g ikapuli.
Una nang gipahibawo sa Cotabato City Police Office nga ilang gibansay ang pipila ka mga sakop sa kapulisan aron nga mamahimong Special Electoral Board ug andam nga mohulip sa mga magtutudlo nga moatras sa piniliay. (Edgar E. Fuerzas)