GITAHO sa opisyal gikan sa Reproductive Health and Wellness Center (RHWC) nga kinatibuk-ang 117 ka kaso sa Human Immunodeficiency Virus (HIV) natala sa Mayo 2025, ang ihap nga susama og dyutay sa niaging tuig.
Si Karla Mae Sepulveda-Edjic, nars sa RHWC, nagkanayon nga nakatala sila og mga 117 ka mga kaso sa HIV sa center, nga hapit susama sa datus gikan sa samang panahon sa niaging tuig.
Apan iyang gitin-aw nga sumala sa Department of Health (DOH), dunay 55 ka nakompirma nga kaso sa HIV sa treatment hub sa Davao City sukad Enero 2025.
Sa dihang gipangutana kung unsay kalahian tali sa datus sa RHWC ug DOH, esplikar ni Edjic nga ang DOH data nagkutlo lang sa kompirmadong mga kaso sa HIV sa mga molupyo sa Davao City, samtang ang RHWC data naglakip sa tanang mga indibiduwal kinsa nakapahimulos sa serbisyo sa center, bisan asa sila nagpuyo. Gitin-aw niya nga ang ubang mga kliyente nagagikan sa mga lugar gawas sa Davao City.
Sa dihang gipangutana sab bahin sa age bracket, gender, ug mode of transmission sa nakompirma nga mga kaso sa HIV sa dakbayan, wa niya gibutyag ang impormasyon, pinaagi sa pag-ingon nga ang mga detalye gikonsidera nga "confidential".
Gisulti ni Dr. Jordana Ramiterre, pangulo sa RHWC nga ang center naghanyag og testing, edukasyon, ug prebensiyon nga mga serbisyo alang sa sexually transmitted infections (STIs) ug HIV. Iya sab nga gisulti nga ang center opisyal na karon nga nahimong treatment hub. Kung ang usa ka pasyente makompirma nga dunay HIV, sugdan na nila ang "lifetime treatment", modawat og suplay sa antiretroviral medicine, ug mopailawom sa regular nga blood monitoring.
Dugang ni Ramiterre nga ang center naghanyag sab og libreng pre-exposure prophylaxis (PrEP) ngadto sa mga "key populations" nga naa sa risgo. Matud niya nga sa usa ka bulan ang ilang buhatan nag-test og mga 400 hangtud 500 ka indibiduwal. Apan, iyang gipahimug-atan nga dunay specific eligibility criteria alang niadtong buot nga mogamit niini. Bisan pa sa mga serbisyo, nagpadayag siya og kabalaka nga daghan pang mga tawo wala mopahimulos sa gihanyag sa RHWC tungod sa padayong "stigma" isip usa sa "main barriers to access".
“For now kasi parang hindi pa maraming umna-access, we are still promoting it marami tayong supply. Right now ang data namin sa RHW nasa 1,000 palang ang nag access nito,” pagtin-aw niya.
Hinuon ilang gipakusgan ang ilang information dissemination sa HIV/AIDS aron motabang sa pagkombati sa "stigma" ug magdasig niadtong naa sa risgo nga mopahimulos sa mga serbisyo nga idalit sa lokal nga panggamhanan.
Gitakda nga ang City Government of Davao mopahigayon og AIDS Candlelight Memorial sa alas 5 sa hapon, Mayo 23, 2025, sa Rizal Park, uban sa tema nga “Rise Above the Stigma, Lead the Way.”
Uban sa candle-lighting ceremony, mopahigayon ang civil society volunteers ug RHWC staff og libreng HIV testing ug modumala og hamubo nga programa. (Rojean Grace G. Patumbon)