12-anyos napatay sa kadula

BUGTO ang kinabuhi sa 12-anyos nga lalaki human aksidenteng napusilan sa kadula niini nga menor de edad sab alas 12:20 sa kaadlawon, Biyernes, Agosto 23, 2024, sa Siyudad sa Cotabato.

Ang biktima giila nga si Salahudin Salik nga nagpuyo sa Purok Tuka Intan RS Buan, Barangay Poblacion, Cotabato City. Samtang ang aksidenteng nakapusil kaniya mao ang iyang silingan nga si alyas Roy, 15-anyos.

Gibutyag ni Cotabato City Police Office Director Colonel Joel Estaris nga nagdula-dula matud pa ang biktima ug ang silingan niini daplin sa sapa duol sa ilang balay kay dugay nangatulog niadtong higayona.

Dala sa suspek ang wala matino nga klase sa pusil ug gition-tiunan ang biktima apan aksidente kini nga mibuto.

Naigo ang biktima sa kilid sa iyang lawas ug gidala sa iyang pamilya sa Cotabato Regional and Medical Center (CRMC) apan nabugtoan kini sa kinabuhi.

Sumala pa nga miikyas ang menor de edad nga silingan ug base sa gihimong imbestigasyon sa kapulisan, migawas nga gipanag-iyahan sa pamilya ni alyas Roy ang pusil.

Gitakda nga isang-at ang kaso batok sa 15-anyos ug sa iyang pamilya nga naghupot og dili lisensiyadong armas. (EEF)