134 balay gilampurnas sa buhawi

MOKABAT sa 134 balay ang nangaguba human sa kusog nga hangin inubanan sa pagbunok sa ulan o buhawi alas 4:00 sa hapon, Lunes, Agosto 19, 2024, sa President Quirino, Sultan Kudarat Province.

Gikumpirma ni Municipal Disaster Risk Reduction and Management (MDRRM) Officer Jonathan Seballos nga sa maong gidaghanon, moabot og 15 balay ang totally damaged sa pagkuso-kuso sa buhawi.

Ang 95 balay nga partially damaged nahimutang sa Barangay Poblacion sa maong lungsod samtang duna sa'y 24 balay sa hilit nga mga barangay.

Natala usab ang kadaut sa pribadong tambalanan ug poultry farm tungod sa kusog nga hangin ug ulan.

Nasayran nga gawas sa nahisgutang danyos, usa ka tawo sab ang naangol ug nagpaalim sa balay tambalanan samtang naa say mga sakyanan nga nangaguba human matumbahi og mga kahoy.

Apil sa mga barangay nga apektado sa buhawi mao ang Pedtitubo, Malengon, Suben, Poblacion ug ang Bayawa.

Sa laing bahin, nanawagan si Mayor Katrina Florida Sandigan sa iyang mga nasakupan nga magmabinantayon, alerto ug kalmado panahon sa mga kalamidad ug magpaabot dayon og impormasyon ngadto sa mga barangay opisyales aron mahatagan og dinalian nga aksiyon.

Ang lokal nga panggamhanan sa Isulan gitakdang motunol og mga hinabang ngadto sa mga apektadong molupyo tungod sa buhawi. (EEF)