COTABATO CITY -- Giihaw sa amahan ang iyang stepdaughter alas 2:20 sa hapon, Lunes, Hulyo 22, 2024, sa Pigcawayan, probinsiya sa Cotabato.
Giila ang biktima nga si Raisa Mambiling, 14-anyos, samtang ang suspek mao si Eric Galliano Farnicio, nagpuyo sa Barangay Poblacion 3, Pigcawayan, Cotabato Province.
Gibutyag ni Pigcawayan Chief of Police, Major Andres Sumugat nga hubog nga nahiabot ang suspek sa ilang balay ug nagkalalis kini sa iyang asawa human gikompronta nga nagsige na lang og inom.
Tungod sa kasuko ni Farnicio, gipangdunggab niini ang mag-inahan ug misibat paingon sa Alamada sa mao gihapong probinsiya sakay sa iyang motorsiklo.
Dali nga gisapupo ang mga biktima sa ilang mga paryente ug silingan ug gipangdala sa balay tambalanan.
Apan gideklara sa doktor nga dead on arrival ang dalagita tungod sa daghang mga samad nga naangkon sa nagkadaiyang parte sa lawas.
Nsayran nga nisurender na unta ang suspek sa kapulisan sa Alamada Municipal Police Station ug gitunol ngadto sa kapulisan sa Pigcawayan MPS apan nakasibat na sab kini.
Gitakda nga isang-at ang tukmang kaso batok sa suspek nga padayon karong gipangita sa kapulisan. (EEF)