PATAY na nga naabot sa ospital ang usa ka 14-anyos kinsa nalumos human nga nangaligo sa Davao River pasado alas 3 p.m. sa Lunes, Abril 15, 2024.
Sa report sa Davao City Police Office (DCPO), ang biktima nailhang si Adrian Kyle Chavez Nermal, residente sa Trading Boulevard, Davao City.
Nasayran nga naligo sa sapa ang biktima uban niini ang iyang mga higala, dihang naabot kini sa lawom nga bahin ug daling gilamoy sa lilo.
Giingong adunay daghang lilo kon kusog nga sulog sa tubig nga nagtuyok hinungdan nga daling nasulod sa lilo ang bata nga miresulta sa pagkalumos.
Nakuha pa sa iyang mga higala ang biktima apan lumoy na kini samtang ilang gihulat ang mi-rescue nga Central 911 Paramedics team.
Miabot sa Dr. Lorenzo Principe Hospital sa Ramon Magsaysay Calinan ang biktima apan gideklara kini ni Dr. Phyllis Glee Guting nga dead on arrival. (JPC)