SA PADAYON nga paningkamot nga mahinloan ang han-ay sa Philippine National Police (PNP), 15 ka mga pulis gikan sa Police Regional Office-Davao Region (PRO-Davao) nag-atubang karon og "dismissal" human nagpositibo sa paggamit og ilegal nga druga ug ang ilang mga kaso naa na karon sa katapusang hugna sa administratibong pagproseso.
Ang maong katikaran kabahin sa padayong paggukod sa PRO-Davao sa paggamit sa ilegal nga druga sa ilang han-ay. Kini nagpakita sa mas halapad nga paningkamot sa institusyon sulod sa PNP aron palig-onon ang propesyonalismo, integridad, ug pagkasihag sa pagpatuman sa balaod.
Gikompirma ni Regional Director Brigadier General Leon Victor Rosete ngadto sa mga tigbalita sa Davao sayo ning semahana nga mga pulis gipailawom na og standard disciplinary proceedings human sa resulta sa ilang positive drug test gikan sa random screenings nga gipasiugdahan sa ilang ahensiya niadtong 2024.
Gitin-aw sab ni Rosete nga ang "drug-free police force" nagpabilin nga kinauyokang haligi sa PNP’s internal disciplinary agenda. Iyang gipahimug-atan ang pagmentinar og istriktong sumbanan, apil na ang kanunay ug di ipahibawo nga drug tests sa tibuok yunit sa kapulisan.
Gawas sa mga personahe nga nalambigit, mga station commanders sa naapektuhan nga mga pulis mag-atubang usab sa sangputanan. Gisulti ni Rosete nga kadtong mga "supervisory roles" di na i-endosar alang sa umaabot nga mga asignatura, nagtumbok sa kapakyas sa ilang liderato ug command responsibility.
Gipahimug-atan sab sa rehiyonal nga direktor nga ang pagpanubag ipatuman sa tanang lebel, ilabi na sa mga sitwasiyon kon diin ang ubos nakaplagan nga naglapas sa pinakauyokang mga sumbanan sa pulis. Determinado ang PRO-Davao nga kalkalon ang pag-abuso sa substansiya ug magpadayon nga molihok batok sa malapason.
Samtang si Rosete nagpunting ngadto sa proactive approach sa PRO-Davao nga ang random inspections himuon kanunay ug niresulta ngadto sa pagkasakop sa mga badlungon nga pulis. Subli niyang gipahayag ang komitment sa buhatan sa pagpahibalik sa pagsalig sa publiko pinaagi sa paglimpyo sa ilang han-ay ug motuman sa pinakataas nga "standards of discipline". (David Ezra Francisquete)