KIDAPAWAN CITY -- Moabot sa 1,554 ka pamilya ang apektado sa baha dala sa bag-ohay nga low pressure area (LPA) sa pipila ka bahin sa Mindanao ug Intertropical Convergence Zone (ITCZ) kon diin daghang mga barangay sa Pikit, Cotabato Province ang apektado usab.
Pipila sa mga barangay mao ang Dalingaoen, Takepan, Ladtingan, ug Ginatilan nga gihulagway nga mga ubos nga bahin sa lugar sa probinsiya.
Nakadugang pa niini ang kusog nga bunok sa ulan hinungdan nga mitaas ang lebel sa tubig-baha.
Ang lokal nga kagamhanan nihatag dayon og libreng tubig mainom sa nahisgutang mga barangay aron nga mapuslan sa mga pamilyang naapektuhan.
Ang Municipal Disaster Risk Reduction and Management Office nihimo na og assessment ug gisumite ang report ngadto sa Provincial Social Welfare and Development ug Department of Social Welfare and Development isip basehan sa ilang tabang. (Edgar E. Fuerzas)